Халықаралық бокс қауымдастығы (IBA) әлем чемпионаты алдында Өзбекстан құрамасына тосын сый жасады. Ұйым командаға арнайы торт тарту еткен.
Бокстан Өзбекстан құрамасының аға бапкері Рахматжон Рузиохунов Instagram-парақшасында IBA атынан жіберілген тортты көрсеткен видеоны жариялады. Роликте бапкер бұл сыйдың мағынасын түсіндіріп, шәкірттеріне мотивациялық сөз арнайды.
Оның айтуынша торт – тек сыйлық емес, алдағы әлем чемпионатында бірінші орынға ұмтылудың символы.
Видео барысында Рахматжон Рузиохунов боксшыларға әзіл мен мотивацияны ұштастыра отырып сөйлейді:
«Мына тортта да бірінші орынды алуымыз керек екенін түсіндіңдер ме? Сол үшін IBA бұл сыйды Өзбекстан құрамасына беріп отыр. Үлкен рақмет айтамын. Мынаны осында қалдырамын, балалар жесін. Жақындап келіп, еркін алыңдар», – дейді ол.
Бапкер сөйлей отырып, жекелеген спортшылар мен әріптестерін атап, оларға да жұрт алдында бата береді:
«Самад аға, сіз де марапатсыз қалмаңыз. Балаларыңыз да, бұйыртса, чемпион болсын. Ұлым да чемпион атансын, өзім де еңбегіммен бағаланайын. Өзбекстанды бағалайтын барша жанға рақмет. Алға, Өзбекстан!» – деп түйіндейді ол.
IBA ұйымдастырып отырған әлем чемпионатына Өзбекстанмен қатар Қазақстан, Ресей және Куба құрамалары да қатысады. Турнирдің жүлде қоры рекордтық 8,3 миллион доллар.
Әлем біріншілігі 13 желтоқсанға дейін жалғасады, ал боксшылар арасындағы ресми жекпе-жектер ертеңнен бастап өтеді.