Еркебұлан Тоқтар Қазақстаннан кетеді
Қазақстандық ММА жауынгері әрі актер Еркебұлан Тоқтар алдағы уақытта елден тысқары дайындыққа шығатынын мәлімдеді.
Майамиге ұшу мерзімі белгілі болды
Еркебұлан Тоқтар Instagram желісіндегі парақшасында жол жоспарын да нақтылап өтті. Оның сөзінше, ол 15 қаңтарда Алматыдан ұшып, 15 наурызда елге оралады.
«American Top Team-ге екі айлық дайындыққа бара жатырмын. Алматы — Майами. 15 қаңтарда ұшамын, 15 наурызда қайтамын. Қазір жақсы билет таңдаймыз… Міне, осы! Бөліп төлей ме? Бах! Алматы — Майами, Майами — Алматы», — деді файтер әлеуметтік желідегі видеосында.
Соңғы жекпе-жегі Ташкентте өтті
Еске сала кетейік, Еркебұлан Тоқтардың соңғы айқасы 27 желтоқсанда болған. Ол өзбекстандық файтер Тимур Никулинге қарсы жұдырықтасты.
Жекпе-жек Ташкенттегі «Хумо-Аренада» бокс ережесі бойынша өтті. Айқас бірінші раундтың 72-секундында аяқталып, қазақстандық спортшы техникалық нокаутпен жеңіске жетті.