Қазақстандық теннисшілер коаламен суретке түсіп, Австралия зообағын тамашалады (ФОТО)
09.04.2025, 13:12
Қазақстан әйелдер теннис құрамасы Billie Jean King Cup іріктеу матчтарына дайындық барысында Брисбен қаласындағы зообақты аралап қайтты.
instagram/@zarinadiyas
Ойыншылар мен бапкерлер құрамы Австралияның ең танымал жануарлары — коала мен кенгурумен танысып, естелікке суретке түсті. Зообақтағы серуен спортшыларға сәл де болса сергіп, алдағы ойындарға дайындықты көңілді жалғастыруға мүмкіндік берді.
Қазақстан құрамасы 10 сәуір күні Billie Jean King Cup іріктеу кезеңін Австралияға қарсы матчпен бастайды. Бұл кездесу қыздарымыз үшін маңызды сынақ болмақ. Ал 11 сәуірде Юрий Щукиннің шәкірттері Колумбия құрамасымен кортта кездеседі.
Қазақстан әйелдер құрамасының сапында мықты ойыншылар бар. Олардың қатарында:
- Елена Рыбакина — WTA турының жұлдызы, Уимблдон чемпионы
- Юлия Путинцева — тәжірибелі әрі мінезді теннисші
- Зарина Дияс — үздік формасына қайта оралуда
- Анна Данилина — жұптық сында сенімді ойын көрсетіп жүрген спортшы
- Жібек Қуламбаева — болашағынан зор үміт күттіретін жас теннисші