Сенсация! Александр Бублик әлемнің бесінші ракеткасынан айласын асырды (ВИДЕО)
Қазақстанның бірінші ракеткасы Александр Бублик "Ролан Гаррос" турнирінің ширек финалына шықты. Бұл – отандасымыздың "Үлкен дулыға" жарыстарындағы осындай алғашқы жетістігі.
Бублик – Дрейпер: бесінші ракеткамен тартысты шайқас
Әлемдік рейтингте 62-орында тұрған Александр Бублик төртінші кезеңде Ұлыбританияның теннисшісі, әлемнің бесінші ракеткасы Джек Дрейпермен кездесті. Жоғары деңгейдегі матч төрт сетке созылып, 5:7, 6:3, 6:2, 6:4 есебімен Бубликтің пайдасына шешілді.
Екінші матчболда жеңісті нүкте қойғаннан кейін қазақстандық спортшы көз жасына ерік берді. Бұл сәт оның ерік-жігерінің, қажыр-қайратының айғағы іспетті.
Ойын статистикасы: брейк, эйс және эмоция
Матч 2 сағат 34 минутқа созылды. Бублик алты брейк-пойнттың бесеуін мүлтіксіз орындады. Жеті эйс жасап, алты рет қосарлы қателікке жол берді. Бұл көрсеткіштер – оның мықты тактикалық дайындықпен келгенін аңғартады.
Бұған дейін Александр Бублик "Ролан Гаррос" турнирінде екінші айналымнан әрі аса алмаған.
Бублик келесі айналымда әлемнің бірінші ракеткасы Янник Синнер (Италия) мен 15-орын иегері Андрей Рублевтің (Ресей) арасындағы матч жеңімпазымен кездеседі.