Қазақстан Өзбекстанға қарсы халықаралық турнирде жұдырықтасты
Хабаровск қаласында Кеңес Одағының Батыры Константин Коротковты еске алуға арналған бокстан халықаралық турнирдің екінші күні өтіп жатыр.
Қазақстан чемпионатының күміс жүлдегері Фарух Тоқтасынов 71 келі салмақ дәрежесінде өзінің екінші жекпе-жегін өткізді. Оның қарсыласы – Өзбекстан спортшысы Асилбек Абдурахмонов болды.
22 жастағы Тоқтасынов жекпе-жек барысында көбіне екінші нөмірмен жұдырықтасты. Бірақ Абдурахмонов шапшаңдығымен және дәл соққыларымен көзге түсті. Үш раундқа созылған тартысты кездесуде төрешілердің шешімімен өзбек боксшысы айқын басымдықпен жеңіске жетті.
Асилбек Абдурахмонов Фарух Тоқтасыновты төрешілердің бірауыздан шығарған шешімі бойынша – 5:0 есебімен жеңіп, келесі кезеңге жолдама алды.
Соынмен қатар 75 келіге дейінгі салмақ дәрежесінде өнер көрсететін қазақстандық боксшы Шұғыла Нәлібай мен өзбекстандық Азиза Зокирова рингте жолықты. Үш раундқа созылған жекпе-жектің қорытындысы бойынша төрешілер Азиза Зокироваға бірауыздан жеңіс берді. Айта кету керек, Зокирова 2024 жылғы Азия чемпионатының күміс жүлдегері саналады.