Сағындық Тоғамбай финалда ресейлік боксшымен қолғап түйістірді
Ресейдің Хабаровск қаласында Константин Коротковты еске алуға арналған халықаралық бокс турнирінде қазақстандық ауыр салмақтағы боксшы Сағындық Тоғамбай финалда ел намысын қорғады.
Сағындық Тоғамбай 92 келіге дейінгі салмақ дәрежесінің финалында ресейлік Сергей Слободянмен қолғап түйістірді. Қатаң әрі қарқынды өткен үш раундтың қорытындысы бойынша төрешілер бірауыздан жеңісті жергілікті спортшыға берді. Есеп 0:5. Осылайша Слободян турнир чемпионы атанды, ал Тоғамбай – күміс медаль иегері.
Айта кету керек, Сағындық Тоғамбай — 2022 жылғы Азия чемпионаты мен Азия ойындарының қола жүлдегері. Ол Қазақстанның ауыр салмақтағы жетекші боксшыларының бірі саналады.
Финалға жолдама алу жолында Тоғамбай Қырғызстан боксшысы Бақыт Токтосун уулумен жекпе-жекке шықты. Кездесу екінші раундта тоқтатылды: рефери Сағындықтың айқын басымдығын байқап, жекпе-жекті мерзімінен бұрын аяқтаған.