Азия чемпионатында үш қазақ боксшысы жартылай финалға шықты (ВИДЕО)
Иордания астанасы Амманда жасөспірімдер арасында бокстан Азия біріншілігі өтіп жатыр. Қазақстандық үш боксшы жартылай финалға жолдама алды.
Аталған турнир жаңадан құрылған World Boxing ұйымының 15-17 жас аралығындағы жас спортшыларға арнаған алғашқы ресми құрлықтық чемпионаты болып отыр. Бұл додаға Азияның 18 елінен 400-ден астам үміткер қатысып, шеберлігін сынға салуда. Қазақстаннан да ұл-қыздарымыз бақ сынап жатыр.
Кезекті жарыс күні ширек финалдық кезең өтті. Бұл кезеңде елдің үш жас боксшысы қарсыластарын сенімді түрде жеңіп, үздік төрттікке енді:
- Біржан Жақып – 37 келі салмақ дәрежесінде;
- Қуаныш Халимбет – 40 келі;
- Шыңғыс Ахметов – 49 келі.
Үшеуі де жартылай финалға өткендіктен, кемінде үш қола медаль еншіленді деген сөз. Ал бұл жүлделердің түсі – алтын, күміс, әлде қола болатынын алдағы күндер көрсетеді.
Өкінішке қарай, Дәулет Теңелбай, Аслан Қайранбай және Жігер Жұман өз жекпе-жектерінде жеңіліп, жарысты ерте аяқтады. Дегенмен қалған боксшыларымыз жарыс жолын бүгін жалғастырады.
Азия чемпионатының жалпы қорытындысы мен жеңімпаздары 30 сәуірде белгілі болады. Қазақстан құрамасының қоржынындағы медаль саны әлі де артуы мүмкін.