Жалғас Жұмағұловты жеңген Ван қайтадан жарқ етті (ВИДЕО)
Жалғас Жұмағұловты жеңген Джошуа Ван UFC-де тағы да сенсация жасады.
АҚШ-тың Лас-Вегас қаласында өткен UFC 317 турнирінде жанкүйерлердің есінде қалатын тартысты жекпе-жек өтті. Джошуа Ван (15-2), бирмандық текті америкалық спортшы, Брэндон Ройвэлді (17-8) сенсациялық түрде жеңіп шықты. Бұл жекпе-жек UFC ең жеңіл салмақтағы жағдайға елеулі әсер етті.
Жекпе-жек барысы: Ройвэл құлады, бірақ аман қалды
Триллерге айналған жекпе-жек үш раундқа созылды. Үшінші раундтың соңында Джошуа Ван қарсыласын нокдаунға жіберіп, соққының астына алды. Алайда, Ройвэлді аяқтайтын сәтті сирена бөліп жіберді. Соған қарамастан, төрешілер бір ауыздан жеңісті Ванға берді.
“Мен бұл сәтті ұзақ күттім. Әлемге өз деңгейімді дәлелдейтін кез келді”, – деді жекпе-жектен кейінгі сұхбатында Джошуа Ван.
Рейтингтегі үлкен өзгеріс
Жекпе-жекке дейін Брэндон Ройвэл ең жеңіл салмақта UFC рейтингінде №1 орында тұрған. Ал Джошуа Ван бар болғаны 12-орында еді. Бұл жеңіс Ванның UFC-дегі болашағына үлкен серпін бермек.
Қазақстандық жанкүйерлер үшін таныс есім
Айта кетейік, Джошуа Ван қазақстандық файтер Жалғас Жұмағұловты 2023 жылдың маусым айында өткен жекпе-жекте бөлінген шешіммен жеңіп, көпшілікті таңғалдырған болатын. Ол кезде де Ван жеңісті сенсация ретінде жұлып алған. Алайда, өкінішке қарай, сол жекпе-жектен кейін Жұмағұлов UFC-дегі мансабын тоқтатты.