28 жастағы боксшы рингте алған жарақатынан кейін көз жұмды
Шигетоши Котари 2 тамызда өткен титулдық жекпе-жекте алған ми жарақатынан кейін қайтыс болды.
Жапониялық боксшы Шигетоши Котари (8-2-2, 5 KO) 8 тамыз, жұма күні ауыр жарақаттың салдарынан өмірден өтті. 28 жастағы спортшы 2 тамызда өткен титулдық жекпе-жекте бассүйек ми жарақатын алған болатын.
Қайғылы жекпе-жек
Котари аса жеңіл салмақтағы белбеу үшін отандасы Ямато Хатамен (17-2-1, 16 КО) Токиодағы 12 раундтық кездесуде күш сынасты. Жекпе-жек тең нәтижемен аяқталғанымен соңғы гонгтан кейін жағдай күрт өзгерді. Боксшы есінен танып қалды.
Жедел тексеру барысында оған ми гематомасы диагнозы қойылып, бірден шұғыл ота жасалды. Дегенмен дәрігерлердің бар күш-жігеріне қарамастан Котаридің жағдайы жақсармады және ол ауруханада жан тапсырды.
Еске алу
Жапониядағы бокс қауымдастығы мен жанкүйерлер әлеуметтік желілерде марқұмның отбасы мен жақындарына көңіл айтты. Шигетоши Котари кәсіби рингте шыдамдылығы, қайсар мінезі және күшті техникасымен танылған спортшы болатын.