«Он алтын аламыз» деген өзбектерді тоқтататын тек Қазақстан ба? Ливерпульдегі айқастың құпиялары

Өзбекстан құрамасы Олимпиада чемпиондарымен

Көршілес ел жарысқа барынша мықты құраммен аттанады:

• 50 кг – Шодияржон Меликузиев
• 55 кг – Миразизбек Мирзахалилов
• 60 кг – Абдумалик Халоков
• 65 кг – Асадхужа Муйдинхужаев
• 70 кг – Шавкатжон Болтаев
• 75 кг – Фазлиддин Эркинбоев
• 80 кг – Жавохир Умматалиев
• 85 кг – Акмалжон Исроилов
• 90 кг – Турарбек Хабибуллаев
• 90+ кг – Жахонгир Зокиров

Әсіресе назар аудартатыны – Париж-2024 Олимпиадасының чемпиондары Абдумалик Халоков пен Асадхужа Муйдинхужаевтың сапта болуы.

Қазақстан құрамасы – жаңа есімдер мен тәжірибелі көшбасшылар

Қазақстанның ерлер құрамасы да мықтылар қатарынан орын алды:

• 50 кг – Санжар Тәшкенбай
• 55 кг – Махмұт Сабырхан
• 60 кг – Бейбарыс Жексен
• 65 кг – Ертуған Зейнуллинов
• 70 кг – Төрехан Сабырхан
• 75 кг – Сабыржан Аққалыков
• 80 кг – Нұрбек Оралбай
• 85 кг – Бекзат Нұрдәулетов
• 90 кг – Сағындық Тоғамбай
• 90+ кг – Айбек Оралбай

Бұл тізімде тәжірибелі чемпиондар да, жаңа жұлдыздар да бар. Ерекше атап өтерлігі – Сабырхан бауырлары. Махмұт соңғы уақытта боксын айтарлықтай жетілдірсе, Төрехан үшін бұл – ұлттық құрамадағы алғашқы ірі сынақ.

Қызықты қарсыласулардың бірі – жастар арасындағы дау

Төрехан Сабырханның қарсыласы болуы мүмкін Шавкатжон Болтаев былтырғы жастар арасындағы Азия чемпионатында қазақстандық Аман Қонысбекпен даулы жекпе-жек өткізген еді. Төрешілер өзбек боксшысына жеңісті беріп, Қазақстан ресми түрде наразылық білдірген болатын. Бұл жағдай Төрехан үшін қосымша мотивация болмақ.

Қазақстандық көшбасшылардың мүмкіндігі

Нұрбек Оралбай – Олимпиада жүлдегері. Оның қарсыласы болуы ықтимал Жавохир Умматалиев әзірге ересектер арасында айтарлықтай жетістікке жете қойған жоқ. Нұрбек үшін бұл турнир – Астанадағы әлем кубогындағы күтпеген жеңілістен кейінгі реванш мүмкіндігі.

Бекзат Нұрдәулетов – 2019 жылғы әлем чемпионы. Оның қарсыласы Акмалжон Исроилов мықты панчер саналса да, тәжірибе жағынан Бекзадтың артықшылығы анық.

Айбек Оралбай – суперауыр салмақта Өзбекстан атынан шығатын Жахонгир Зокировпен жұдырықтасуы мүмкін. Бұл жекпе-жек чемпионаттың нағыз басты айқасына айналуы ғажап емес.

Өзбекстанның жоспары мен Қазақстанның жауабы

Жахонгир Зокиров чемпионат алдында берген сұхбатында:

«Біздің мақсатымыз – он салмақтың бәрінде алтын алу», – деп мәлімдеді.

Алайда Қазақстан құрамасы бұл сөзбен келіспейді. Сабырхан бауырлары бастаған жаңа толқын мен тәжірибелі көшбасшылардың арқасында біздің боксшылар сенсация жасауға дайын.