Әлем чемпиондары Руслан Берденовке алғыс білдірді
Ливерпульдегі әлем чемпионатында жеңіс тұғырынан көрінген қазақстандық боксшылар Шымкент қаласы әкімінің бұрынғы орынбасары Руслан Берденовке алғыс айтты.
Айбек Оралбайдың жүрекжарды сөзі
Жеңімпаздардың бірі Айбек Оралбай арнайы бейнеқұттықтауында өз ризашылығын жеткізді:
«Ассалаумағалейкум, Руслан аға! Жеңіс құтты болсын! Бұл – барша Қазақстанның жеңісі. Сіздің еңбегіңіз зор, әрдайым қолдау көрсетіп келесіз. Денсаулығыңызды түзеп алыңыз, кейін қайтадан бірге жаттығамыз. Сізсіз спаррингтеріміздің сәні келмей тұр. Шымкенттің бокс мектебі әрқашан ерекше. Бекзат Саттарханов салған жолды біз жалғастырып келеміз», – деді спортшы.
Махмұд Сабырхан да үн қосты
Әріптесінің сөзін жалғаған Махмұд Сабырхан да Берденовке шын жүректен алғыс айтып, сәттілік тіледі.
Өз кезегінде Руслан Берденов жас чемпиондардың ыстық ықыласына әлеуметтік желіде жауап берді:
«Еліміздің қайсар алтын жігіттері! Мен де спаррингтерді сағындым. Қазақ боксының, оның ішінде Шымкент мектебінің әлемге көрсететіні әлі алда», – деп жазды ол.