Қазақ боксшысын комаға түсірген кубалық чемпиондық белбеу үшін айқасуға жақын
Жартылай ауыр салмақта (79 кг) жаңа үлкен айқас ұйымдастырылып жатыр. The Ring Magazine дерегінше, WBO уақытша чемпионы Каллум Смит келесі жылы Дэвид Моррельге қарсы чемпиондық белбеуін қорғайды.
Смит пен Моррельдің соңғы жекпе-жектері
Британиялық Каллум Смит ақпан айында Эр-Риядта өткен турнирде Джошуа Буасимен айқасып, төрешілер шешімімен жеңіп, WBO уақытша титулын иеленген.
Ал кубалық Дэвид Моррель бұған дейін Дэвид Бенавидестен жеңілген. Содан кейін Имам Хатаевты бөлек шешіммен ұтып, өз карьерасын қайта жандaндырған.
Қазақ жанкүйерлері үшін ауыр естелік
Моррель есімі қазақстандық көрермендерге жақсы таныс. 2022 жылы ол Айдос Ербосынұлымен кездесіп, сол жекпе-жекте қазақстандық боксшыны ауыр нокаутпен жеңген еді.
Сол соққыдан кейін Айдос комаға түсіп, ұзақ уақыт ем қабылдады. Осы оқиғадан бері Ербосынұлы рингке қайта шыққан жоқ.