Қазақстандық таэквондошы әлем чемпионатында тарихи медаль иемденді
Нодира Ахмедова Қытайдың Уси қаласындағы әлемдік додада ел намысын абыроймен қорғап, қола медаль жеңіп алды. Бұл — Қазақстан әйелдер құрамасы үшін 18 жылдан кейін келген тарихи жетістік.
Ахмедова 49 келіге дейінгі салмақ дәрежесінде бақ сынады. Ол жарысты жартылай финал кезеңінде аяқтап, үздік үш спортшының қатарына енді. Нодирс жартылай финалда қытайлық Тайпей өкілі Ю Юн Люге жол беріп, қола жүлдемен тоқтады.
Қазақстандық спортшы чемпионат барысында төрт кездесу өткізіп, оның үшеуінде жеңіске жетті. Екінші айналымнан бастап бақ сынаған Нодира Бразилия, Канада және Таиланд спортшыларын сенімді түрде ұтты.
Айта кету керек, бұл медаль — Ахмедованың кәсіби мансабындағы ең ірі жетістігі. Сонымен қатар Қазақстан әйелдер таэквондосы үшін 2007 жылдан кейінгі алғашқы әлемдік жүлде. Сол жылы Бейжіңде өткен чемпионатта қазақстандық спортшы әйелдер командасына қола медаль сыйлаған еді.