Еркебұлан Тоқтар – Джейк Пол: шындық па, әлде хайп па?
Қазақстандық жекпе-жек әлемін дүр сілкіндірген күтпеген жаңалық шықты: отандық Octagon промоушені планетадағы ең көп талқыланатын боксшы-блогер — америкалық Джейк Полға ресми түрде үндеу жасады.
Ұйым қазақстандық ММА-ның басты медиа-фигурасы Еркебұлан Тоқтармен ықтимал жекпе-жек өткізуге ишара жасады.
Хайп па, әлде нақты жоспар ма?
Octagon промоушенінің ресми парақшаларында екі спортшы бейнеленген видеоколлаж жарияланды. Жазбада қысқа әрі нұсқа түрде: «Джейк Пол — Еркебұлан Тоқтар» деп көрсетілген. Бұдан бөлек, ұйымдастырушылар америкалық боксшыны белгілеп, әзіл мен астары бар сұрақ қойды:
«Бір шыны кофе үстінде стратегиялық кездесу өткіземіз бе?»
Публикация иронияға толы болғанымен, жанкүйерлер оны батыл әрі ауқымды бастаманың белгісі ретінде қабылдады. Тоқтар мен Полдың жолы ұқсас: екеуі де жекпе-жек спортына ойын-сауық индустриясынан келіп, медиялық танымалдықты нақты нәтижемен және соққы күшімен дәлелдей алды.
Джейк Пол: Тайсоннан Джошуаға дейін
2025 жыл Джейк Полдың мансабындағы ең маңызды кезеңдердің біріне айналды. Алдымен ол аңыз Майк Тайсонмен даулы әрі үлкен резонанс тудырған жекпе-жек өткізсе, 20 желтоқсанда суперауыр салмақтағы бұрынғы әлем чемпионы Энтони Джошуамен рингке шықты.
Майамиде өткен кездесуде Пол алтыншы раундта нокаутқа түсіп, кәсіби мансабындағы алғашқы ауыр жеңілісіне ұшырады. Дегенмен оның гонорар көлемі мен медиа-қамту көрсеткіштері әлі күнге дейін көптеген кәсіпқой боксшылар үшін қолжетпес деңгейде қалып отыр.
«Қазақ жауынгері» бабында
Ал Еркебұлан Тоқтар дәл қазір формасының ең жоғары шегінде. 27 желтоқсанда Ташкентте өткен турнирде ол поп-бокстың танымал өкілі Тимур Никулинді небәрі 72 секундта есеңгіретіп, көрерменді дүр сілкіндірді.
Бірінші раундтағы бұл найзағайдай жылдам жеңіс Тоқтардың әлемдік деңгейдегі сынақтарға дайын екенін айқын аңғартты. Ал Джейк Полмен ықтимал жекпе-жек ТМД мен Батыс аудиториясын біріктіріп, қазақстандық жекпе-жек тарихындағы ең кассалық оқиғалардың біріне айналуы әбден мүмкін.