Жуырда, атап айтқанда, ақпанның 21-і күні отандасымыз UFC лигасындағы алғашқы айқасын өткізеді. Қарсылас - ямайкалық файтер Оди Осборн (13-9).
Қазақстандық ММА жауынгері Әліби Ыдырыс UFC-дегі дебюті алдында допинг-тексеруден өтті. Бұл туралы UFC Drug Testing Watch Х-парақшасы хабарлады. Бұл аккаунт UFC ростеріндегі файтерлерге жүргізілетін антидопингтік тексерістерді тұрақты түрде бақылап отырады.
Ақпаратқа сәйкес, Әліби Ыдырыстан сынама өткен аптада алынған. Бұл қазақстандық файтер үшін биылғы бірінші тексеру.
Әліби Ыдырыс UFC-дегі алғашқы айқасын 21 ақпанда өткізеді. Жекпе-жек АҚШ-тың Хьюстон қаласында ұйымдастырылатын UFC Fight Night кеші аясында өтеді. Отандасымыз Қазақстан уақытымен 22 ақпанға қараған түні октагонға шығады.
Қарсылас — аса жеңіл салмақ дәрежесінде өнер көрсететін ямайкалық файтер Оди Осборн (13-9).
Айта кетейік, Әліби Ыдырыстың соңғы жекпе-жегі 17 тамызда өтті. Ол UFC 319 турнирі аясындағы The Ultimate Fighter реалити-шоуының финалында америкалық Джозеф Моралеске (14-2) сабмишнмен жол берді. Соған қарамастан, қазақстандық файтер әлемдегі ең беделді ММА лигасы — UFC-пен келісімшартқа отырды.