Бибарыс Әшірбай Таиландта өтіп жатқан Futures Cup (U19) турнирінде финалға шықты.
Бангкоктегі Futures Cup U19 турнирінде Қазақстан құрамасының тағы бір өкілі финалға шықты. Бұл жолы жанкүйерлерді 70 келіге дейінгі салмақта Бибарыс Әшірбай қуантты.
Жартылай финалда оған морокколық Маруан Джафри қарсы тұрды. Жекпе-жек басталған сәттен-ақ Әшірбай рингтегі басымдықты өз қолына алды.
Бибарыс Әшірбай бұл кездесуде өзіне тән мәнерде жұдырықтасты. Ол асығыс қимылға бармай, сәтті мезетті күтіп, қарсыласының осал тұстарын дәл тапты. Әсіресе дене мен басқа бағытталған соққыларды шебер үйлестіріп, шабуылды әр қырынан өрбітті.
Қазақстандық былғары қолғап шебері жекелеген соққыларды да, бірнеше соққыдан тұратын комбинацияларды да тиімді қолданды. Қарсыласын әр деңгейде жұмыс істеу арқылы әбден әбігерге салды.
Жекпе-жек барысында Маруан Джафри көбіне қорғанумен шектелді. Ол қазақстандық боксшының қысымына төтеп бере алмай, жиі шегінуге мәжбүр болды. Әшірбайдың сенімді қимылы мен техникалық артықшылығы қарсыласын ыңғайсыз жағдайға қалдырды.
Кездесудің белгілі бір сәттерінде Бибарыс рингте шоу элементтерін де көрсетіп, өзіне деген сенімділігін аңғартты. Бұл қарсыластың жүйкесіне әсер етіп, оның қателігін көбейтті.
Қорытындысында Бибарыс Әшірбай Маруан Джафриді төрешілер шешімімен жеңіп, Futures Cup турнирінің финалына шықты.