Бразилиядағы бокс кешінде бір қуаныш, бір өкініш: қазақстандықтар қалай жұдырықтасты
Бразилияның Фос-ду-Игуасу қаласында бокстан World Boxing ұйымының әлем кубогы кезеңінде жарыстың төртінші күнгі күндізгі сессиясында Қазақстан атынан екі боксшы шаршы алаңға шықты.
Алуа Балқыбекова ширек финалда
Алуа Балқыбекова 55 келіге дейінгі салмақ дәрежесінің 1/8 финалында Болгария боксшысы Златислава Чукановамен кездесті. Жекпе-жекте қазақ қызы төрешілердің 4:1 есебіндегі шешімімен жеңіске жетті.
Осылайша Алуа Балқыбекова турнирдің ширек финалына жолдама алды.
Мұхамедсабыр Базарбайұлы жарысты аяқтады
65 келіге дейінгі салмақта сынға түскен Мұхамедсабыр Базарбайұлы 1/8 финалда франциялық Уго Грауға қарсы қолғап түйістірді. Бұл кездесуде төрешілер шешімі қарсылас пайдасына шығып, қазақстандық былғары қолғап шебері 2:3 есебімен жеңіліп қалды.
Кешкі сессияда Аида Әбікееваны көреміз
Төртінші жарыс күнінің кешкі сессиясында Қазақстан құрамасының тағы бір боксшысы Аида Әбікеева өз жекпе-жегін өткізеді. 65 келіге дейінгі салмақтың 1/8 финалында чехиялық Виктория Жилковамен кездеседі.