Қазақстандық боксшының әлем кубогындағы айқасы тартысты өтті
Фос-ду-Игуасу қаласында World Boxing ұйымдастырған әлем кубогының алғашқы кезеңі жалғасып жатыр. Жарыстың бесінші күнінде Фарух Тоқтасынов шаршы алаңға шықты.
Ширек финалдағы жекпе-жек
70 келіге дейінгі салмақта өнер көрсететін Фарух Тоқтасынов ширек финалда әзербайжандық Наби Исгандаровпен кездесті. Жекпе-жек ә дегеннен-ақ жоғары қарқынмен басталды. Бірінші раундта қос боксшы да бір-бірінің осал тұсын іздеп, сақ әрі белсенді қимылдады. Төрешілер бұл бөлімде аз ғана басымдықты әзербайжандыққа берді — 3:2.
Айқас қатты соққы алмасуға ұласты
Екінші раундта кездесу одан сайын қыза түсті. Боксшылар ашық шабуылға көшіп, ринг ортасында бірнеше мәрте ауыр соққы алмасты. Бұл раундта да Исгандаров дәлдігімен көзге түсіп, төрешілердің бағалауында алға шықты.
Үшінші раундта Тоқтасынов жағдайды өзгертуге тырысты. Қазақстандық боксшы қысымды күшейтіп, жекпе-жекті өз пайдасына бұруға ұмтылды. Алайда төрешілер қорытынды шешімде жеңісті Наби Исгандаровқа берді.
Үш раунд нәтижесінде Фарух Тоқтасынов қарсыласына 2:3 есебімен есе жіберді. Осылайша Қазақстан өкілі ширек финалда жарыс жолын аяқтады.