Балауса Мұздыман қарсыласын білді
Қазақстандық кәсіпқой боксшы Балауса Мұздыманның келесі жекпе-жектегі қарсыласы анықталды.
Айқас Алматыда өтеді
Кәсіпқой бокста 9 кездесу өткізіп, бәрінде жеңіске жеткен Балауса Мұздыманның еншісінде 7 нокаут бар. Қазақ қызы 25 шілде күні Алматыдағы Балуан Шолақ атындағы спорт сарайында Akhmedov Promotions ұйымдастыратын бокс кешінде өнер көрсетеді.
Ол алдағы жекпе-жекте қырғызстандық Аделина Сатыбалдиевамен кездеседі. Қарсыласы әуесқой бокста өз елінің чемпионы атанған боксшы ретінде танымал.
Бұл кездесу Балауса Мұздыман үшін былтыр 5 қыркүйектен кейінгі алғашқы ресми жекпе-жек болмақ. Сол кезде қазақстандық боксшы Алматыда үндістандық Мамта Сингхті төртінші раундта техникалық нокаутпен жеңген.
Осы жеңістен кейін Мұздыман біраз уақыт рингке шықпады. 2026 жылдың көктемінде АҚШ-та оқу-жаттығу жиынын өткізіп, алдағы кездесулеріне дайындық жүргізді.
Жеңісті сериясын жалғастыруға ниетті
Балауса Мұздыман кәсіпқой бокста әзірге жеңіліссіз келеді. Алматыдағы алдағы кездесу оның мансабындағы маңызды кезеңдердің бірі болуы мүмкін. Кәсіпқой боксшы өз жанкүйерлері алдында жеңісті сериясын жалғастырып, рейтингтегі орнын нығайтуды көздейді.