Жәнібек Әлімханұлы әлем чемпионы атағы үшін жекпе-жек өткізеді
Қазақ боксшысы екінші орта салмақта WBO тұжырымы бойынша әлем чемпионы атағы үшін даниялық Якоб Банкпен (20-0, 11 КО) қолғап түйістіреді.
Әлімханұлы қашан және кіммен жұдырықтасады?
Даниялық Primetime Boxing промоутерлік компаниясы қазақстандық боксшының алдағы кездесуі туралы ресми мәлімдеме жасады. Жекпе-жек 2027 жылдың 23 қаңтарында Данияның Хорсенс қаласында өтеді.
Екі боксшы да кәсіпқой рингте әлі жеңіліп көрмеген. Сондықтан бұл кездесу олардың мансабындағы маңызды сынақтардың біріне айналмақ.
Екінші орта салмақтағы WBO тұжырымы бойынша әлем чемпионы атағы бұған дейін британдық Хамза Ширазға тиесілі болған. Бірақ Шираз Жәнібек Әлімханұлына қарсы міндетті титул қорғау жекпе-жегінен бас тартып, чемпиондық белбеуді босатқан. Осы шешімнен кейін Дүниежүзілік бокс ұйымы (WBO) қазақстандық боксшы мен даниялық Якоб Банк арасындағы кездесуді өткізуге рұқсат берді.
Жекпе-жек қалай келісілді?
WBO шешімінен кейін екі боксшының өкілдері келіссөз жүргізіп, белгіленген мерзімде ортақ мәмілеге келген. Осылайша жекпе-жекті ұйымдастыру құқығын анықтайтын промоутерлік сауда-саттық өткізу қажеттілігі туындамаған.
Нәтижесінде Primetime Boxing компаниясы Әлімханұлы мен Банк арасындағы чемпиондық кездесуді ресми түрде жариялады.
Алдағы жекпе-жекте қазақстандық боксшы екінші орта салмақта WBO тұжырымы бойынша әлем чемпионы атануға мүмкіндік алады. Бұл үшін Жәнібекке кәсіпқой мансабында 20 кездесудің барлығында жеңіске жеткен Якоб Банкті ұту қажет.
Қарсыластардың жеңіліссіз көрсеткіші Хорсенстегі кездесуге деген қызығушылықты арттыра түседі. Егер Әлімханұлы жеңіске жетсе, 2027 жылды жаңа салмақтағы әлем чемпионы атағымен бастайды.