Жәнібекке бокс туралы сандырағын доғару ұсынылды
Отандасымыз бокстағы жағдайға өз шағымын білдірген болатын.
Танымал инсайдер әрі бокс шолушысы Дэн Рафаэль WBO және IBF нұсқалары бойынша әлем чемпионы Жәнібек Әлімханұлының әлеуметтік желідегі жазбаларына қатысты жеке пікірін білдірді.
Айта кетейік, қазақстандық былғары қолғап шебері әлеуметтік желідегі парақшасында бокстағы жағдайға шағымын білдірген еді. Атап айтқанда Жәнібек басқа чемпиондар өзіне қарсы титул біріктіретін айқас өткізгісі келмейтінін сондай-ақ "бокс қазір бизнеске айналып кеткен" деп жазған болатын.
Отандасымыздың бұл пікіріне Дэн Рафаэль мынадай жауап жазды.
"Бокс ӘРДАЙЫМ бизнес болып келді. Сандырақтай беруді доғару керек. Оның бизнес болғанына 100 жылдан асты".
Рафаэльдің әріптесі Буг Уильямс та шет қалмай, Жәнібектің жазғанына өз ойын қоса кеткен.
"Мұнда сенің де кінәң бар. Сен өзіңді бугимен деп атайсың, ал бугимен болудың құны осы".