Даниал Сапарбай Бразилияда керемет камбэк жасады
Қазақстандық аса ауыр салмақтағы боксшы Даниал Сапарбай Бразилияда өтіп жатқан бокстан Әлем кубогында алғашқы жекпе-жегін жеңіспен бастап, жартылай финалға жолдама алды.
Фос-ду-Игуасу қаласында World Boxing ұйымының бастамасымен ұйымдастырылған Әлем кубогының 1/4 финалында Даниал Сапарбай 90 келіден жоғары салмақта Үндістан өкілі Нарендермен қолғап түйістірді. Бастапқы раундта Сапарбай айқын басымдықпен ұтылып қалды. Дегенмен келесі раундтарда мінез көрсетіп, 3:2 есебімен төрешілер шешімімен жеңіске жетті.
Осылайша Даниал жартылай финалға шығып, кем дегенде қола медаль еншілеуге мүмкіндік алды. Ал үнділік Нарендер медальсыз қайтуға мәжбүр болды.
Айта кетейік, Қазақстан ерлер құрамасы бұл турнирге толық құрамда барған. Жарысқа қатысушы боксшылар тізімі келесідей:
- Нұрзат Оңғаров (50 кг)
- Нұрсұлтан Алтынбек (55 кг)
- Талғат Сырымбетов (60 кг)
- Алмат Әбдуали (65 кг)
- Дархан Дүйсебай (70 кг)
- Диас Молжігітов (80 кг)
- Дәулет Түлемісов (85 кг)
- Даниал Сапарбай (90+ кг)