"Екі әйнегі бар". Алматыда терезесі күңгірттелген жүргізуші ұсталды (ВИДЕО)
12.05.2025, 21:34
Алматыда патрульдік полиция күңгірт әйнек орнатылған көлікті тоқтатып, жүргізушіге қатысты әкімшілік шара қолданды.
фото ашық дереккөздерден алынды
"Қауіпсіз жол" шеңберіндегі тексеріс
Тәртіп сақшылары "Қауіпсіз жол" жедел-профилактикалық шарасы барысында Түрксіб ауданында Hyundai маркалы автокөлікті тоқтатқан. Көлікті 24 жастағы азамат жүргізіп келе жатқан.
Екі қабатты әйнек – бір батырмамен ауысады
Тексеру кезінде көліктің терезелерінде екі әйнек орнатылғаны анықталды: біреуі – күңгірт, екіншісі – стандартты мөлдір әйнек. Видеожазбадан көрінгендей, жүргізуші арнайы тетік арқылы терезелерді ауыстырып отыра алады.
Полиция дерегінше, азамат дәл осы күңгірт әйнекпен жүрген кезде тоқтатылған. Заң бұзушылық дерегі тіркеліп, тиісті әкімшілік шара қолданылды.