Өзбекстанда жол ережесін бұзғандар айып балын алады
Өзбекстан президенті Шавкат Мирзиёев жол ережелеріне айып балы жүйесін енгізу туралы заңға қол қойды.
Айып балы жүйесі қалай жұмыс істейді?
Жүргізуші белгілі бір құқық бұзушылық үшін негізгі жазадан бөлек айып балын алады. Бірақ бір рет ереже бұзған жағдайда ең көбі 2 балл ғана беріледі. Жыл сайын айып балдары жаңарып отырады. Егер жүргізуші 12 ай ішінде 12 балл жинаса, ол 6 айдан 3 жылға дейін көлік жүргізу құқығынан айырылады. Қосымша актілер бұл мерзімдердің қандай жағдайда өзгеретініне қатысты толық мәлімет береді.
Қандай жағдайда айып балы беріледі?
Айып балын алуға әкелетін заң бұзушылықтарға мыналар жатады:
- Техникалық ақауы бар көлікті жүргізу
- Мемлекеттік нөмірсіз көлік жүргізу
- Жаяу жүргіншілер жолымен жүру
- Жол белгілерін елемеу
- Жылдамдықты асыру (0.5-2 балл)
- Бағдаршамның қызыл түсіне өту (1.5 балл)
- Аялдау ережесін бұзу
- Кептелісте себепсіз дыбыс сигналын пайдалану
Айып балдарын есепке алу:
Барлық айып балы E-jarimaball жүйесінде тіркеледі. Жүргізуші 8 балл жинағанда SMS арқылы ескерту алады. 12 балдан асқан жағдайда тағы бір рет ескертіліп, жүргізуші куәлігінен уақытша айырылады.
Қазақстанда айып балы жүйесі енгізіле ме?
Қазақстанда да осындай жүйені енгізу мәселесі бірнеше рет көтерілген. Алайда Ішкі істер министрлігі бұл қадамға әлі ерте екенін айтып, жүйені жан-жақты зерттеу қажеттігін алға тартады. Сонымен қатар, билік ереже бұзбайтын жүргізушілерге жеңілдік жасау мүмкіндігін қарастыруда. Бірақ айыппұлды 50% жеңілдікпен төлеу ережесін алып тастау жоспарлануда.