Астана әкімі Жеңіс Қасымбек Есіл ауданы тұрғындарымен есептік кездесу барысында қала жолдарын жеңілдету үшін қабылданатын шаралар туралы айтты.
Әкімнің айтуынша, кептеліс мәселесін шешудің жалғыз жолы – қоғамдық көлікті барынша тиімді пайдалану және жеке автокөліктерді қолдануды азайту. Осы мақсатта 2024 жылы елордада қосымша 400 автобус іске қосу жоспарланған.
Сонымен қатар, қалада көпірлер салу жұмыстары жүргізіліп жатыр.
"Былтыр ғана Сарайшык ауданында Тәуелсіздік көшесінде жаңа көпір аштық. Қазіргі уақытта тағы екі көпірдің жобасы әзірленуде", – деді әкім.
Қала басшысы көлік тұрақтарын ұйымдастыруға қатысты өзгерістер енгізу жоспарланғанын атап өтті. Оның ішінде тұрақ құнына қатысты да жаңа шешімдер қарастырылып жатыр. Бұл ретте қала билігі тұрақ басқару кәсіпорнын қаланың балансына өткізуді ұйғарған.
"Біз нақты шаралар кешенін әзірледік. Алдағы бір ай ішінде жол картасын ресми түрде жариялап, көлік қозғалысын жақсарту үшін қандай қадамдар жасалатынын көрсетеміз", – деп түйіндеді Қасымбек.
Айта кетейік, 28 қаңтарда өткен Үкіметтің кеңейтілген отырысында Президент Қасым-Жомарт Тоқаев Астана әкімдігіне кептеліс мәселесін шешу бойынша шұғыл шаралар қабылдауды тапсырған болатын.
