Бірінші раундта жеңіп жатқан қазақ боксшысы әлем чемпионатының финалында ұтылды

Қазақстан – Өзбекстан финалы

90 келіден жоғары салмақ дәрежесінде Қазақстан намысын қорғаған Владислав Саможонов финалда өзбекстандық Ислам Салиховпен жұдырықтасты.

Алтын медаль сарапқа салынған кездесу тартысты басталды. Бірінші раундта қазақстандық боксшы қарсыласынан басым түсіп, төрешілердің 3:2 есебіндегі қолдауына ие болды.

Алайда екінші раундта жағдай өзгерді. Ислам Салихов белсенділігін арттырып, төрешілер бағалауы бойынша алға шықты.

Алтын медаль тағдыры шешуші раундта анықталды

Үшінші раундта екі боксшы да жеңіске жетуге ұмтылды. Дегенмен соңғы үш минуттық кезеңде төрешілер өзбекстандыққа басымдық берді.

Шешуші раундтың қорытындысы бойынша Ислам Салихов 4:1 есебімен басым түсті.

Осылайша Владислав Саможонов әлем чемпионатының күміс жүлдегері атанса, Ислам Салихов алтын медаль жеңіп алды.

Саможонов әлем чемпионатында қалай өнер көрсетті?

Қазақстандық ауыр салмақ өкілі Будвадағы дүбірлі додада бірнеше маңызды жеңіске қол жеткізіп, финалға дейін жетті.

Атап айтқанда, ширек финалда Саможонов германиялық Олувайоми Ремелмен кездесіп, үш раунд қорытындысында 5:0 есебімен жеңіске жеткен болатын.

Бұл жекпе-жекте қазақстандық боксшы қарсыласын екінші және үшінші раундтарда нокдаунға түсіріп, өзінің басымдығын дәлелдеді.

Нәтижесінде отандасымыз әлем чемпионатының финалына дейін жетіп, жарысты күміс жүлдемен аяқтады.