"Бавария" - "Челси": Тартысты матчта төрт гол соғылды

Мюнхенде өткен Чемпиондар лигасының жаңа маусымындағы алғашқы турдың басты ойыны жанкүйерлер күткендей драма мен голға толы болды. «Бавария» өз алаңында «Челсиді» 3:1 есебімен тізе бүктіріп, алғашқы үш ұпайын еншіледі.

20-минутта «Челси» қорғаушысы Трево Чалоба өз қақпасына гол соғып алды. Бар болғаны 7 минуттан кейін Харри Кейн пенальтиді дәл орындап, мюнхендіктердің басымдығын еселеді – 2:0.

Алайда лондондықтар да қарымта қайтара білді. 29-минутта жас жұлдыз Коул Палмер тамаша шабуылдың нүктесін қойып, есеп айырмасын қысқартты – 2:1.

Екінші тайм

Кездесудің екінші жартысында «Бавария» қарқынын үдете түсіп, тағы бір гол соқты. 63-минутта Харри Кейн дубль авторы атанды. Ал 89-минутта Коул Палмер тағы да қақпаны дәл көздеді, бірақ бұл жолғы гол офсайдқа байланысты есепке алынбады.

Нәтижесінде матч 3:1 есебімен аяқталды. Жеңіс мюнхендіктерде.

Алдағы ойындар

Келесі турда яғни 30 қыркүйек күні «Бавария» Кипрде «Пафоспен» кездеседі. Сол күні «Челси» өз алаңында Португалияның «Бенфикасын» қабылдайды.