Нутрициологтар кеңесі: Аптасына неше рет ірімшік жеу керек?
Ірімшік – дәруменге, ақуызға, кальцийге бай тағам. Бірақ оны күнделікті таңғы, түскі және кешкі асқа жеу ағзаға пайдалы ма, әлде зиян ба? Диетологтар ірімшіктің пайдасы мен қауіпті тұстарын түсіндірді.
Ірімшіктің құндылығы
Ірімшік – ақуыздың, кальцийдің, мырыш пен фосфордың сенімді көзі. Әсіресе вегетариандық диета ұстанатындар үшін ол аса маңызды.
Сонымен қатар, В тобының дәрумендері (B2, B9, B12) бар. Ал кейбір ірімшік түрлерінің қыртысында өмір сүретін пробиотиктер ішек микрофлорасын нығайтып, иммунитетті күшейтеді.
Қанша рет жеуге болады?
Нутрициологтар кеңесі: «Ірімшікті аптасына 2–3 рет тұтыну жеткілікті. Әр тамаққа қосу калория мен тұздың шамадан тыс жиналуына әкелуі мүмкін».
Ірімшік – жоғары калориялы тағам. Ондағы қаныққан май қышқылдары мен натрий жүрек-қан тамырлары аурулары мен артық салмақ қаупін арттырады.
Қалай үйлестірген дұрыс?
- Бір тамақта ірімшік жесеңіз, йогурт секілді басқа сүт өнімдерін қоспаған жөн. Оның орнына жеміс таңдаған дұрыс.
- Жаңа піскен және қатты ірімшік түрлерін алмастырып отыру ағзаға пайдалы.
- Лактозаға төзімсіз адамдар үшін қой немесе ешкі сүтінен жасалған ірімшік жеңілірек қорытылады.
- Кейде бір бокал қызыл шараппен үйлескен ірімшік дастарханның сәнін келтіреді. Бірақ басты қағида – тепе-теңдік.
Ірімшікті «зиянды» деп жоққа шығаруға болмайды. Ол — құнды тағам, дұрыс мөлшерде қолданылса денсаулыққа пайдасы мол. Бірақ күнделікті әр асқа қосу ағзаға артық салмақ түсіреді. Ең дұрыс шешім — ірімшікті аптасына бірнеше рет, басқа жеңіл протеиндермен (балық, құс еті, бұршақ дақылдары) үйлестіріп тұтыну.