Римде футбол үшін соғыс басталды. "Лацио" мен "Рома" фанаттары көшені қиратып тастады (ВИДЕО)
Италия астанасында "Лацио" мен "Рома" арасындағы мәңгілік дерби алдында жанкүйерлер арасында қақтығыс болып, Рим көшелері алаңға айналды.
Италия Серия А-сының 32-турында өткен “Лацио” мен “Рома” арасындағы римдік дерби — елдегі ең қызу қарсыласулардың бірі. Бұл тек футбол ғана емес, қаладағы нағыз идеологиялық және мәдени қақтығыс. Көптен күткен матч қарсаңында екі клубтың жанкүйерлері Рим көшелерінде жаппай тәртіпсіздік ұйымдастырды.
Куәгерлердің айтуынша, фанаттар мопедті қиратып, электросамокат лақтырған, әртүрлі заттармен бірін-бірі атқылаған.
Бұл оқиғалар полиция араласуын қажет етті. Қаланың бірқатар аудандарында қозғалыс шектеліп, тәртіп сақшылары жағдайды бақылауға алды.
Атышулы қақтығыстардан кейін өткен дербидің өзі бейбіт аяқталды. Тараптар 1:1 есебімен тең ойнады. 47-минутта “Лацио” сапынан Алессио Романьоли есеп ашты. 69-минутта Матиас Суле таразы басын теңестірді.
Матчтағы шиеленіс тек алаңмен шектелді, алайда фанаттар арасындағы оқиға футбол мерекесінің көлеңкесінде қалды.