Қазақстандық төреші Болат Сариев 12–29 маусымы аралығында Словакияда өтетін 21 жасқа дейінгі жастар арасындағы Еуропа чемпионатының (UEFA U21) финалдық кезеңіне төреші ретінде шақырылды.
Ұзақ үзілістен кейін қазақстандық төрешілердің бірі алғаш рет УЕФА ұйымдастырған ірі турнирдің шешуші кезеңінде төрелік етуге мүмкіндік алды. Бұл — елдегі футбол төрешілік мектебі үшін үлкен жетістік.
"Бұл — Қазақстан футболы үшін үлкен жетістік. Болат Сариев төртінші төреші ретінде тәжірибе жинап, халықаралық деңгейдегі беделін арттыра алады", — делінген ҚФФ хабарламасында.
Сариевтің төрешілік ететін алғашқы ойыны 12 маусымда Финляндия мен Нидерланд құрамалары арасында өтеді. Кездесу Астана уақыты бойынша түнгі сағат 00:00-де басталады.
Турнирге төрелік және инспекция бөлімі атынан Нуну Алешандре Каштру да қатысады. Ол төрешілер жұмысына талдау жасап, ресми нұсқаушы және бақылаушы қызметін атқарады.
"Болат Сариев пен Нуну Каштрудың осы додаға қатысуы — УЕФА тарапынан қазақстандық төрешілерге деген сенімнің айғағы. Бұл – төрешілер дайындығының сапасы артып келе жатқанының көрсеткіші", — деп атап өтті ҚФФ баспасөз қызметі.