Шымкент қалалық прокуратурасы "Ордабасы" ФК бұрынғы басшылығына қатысты қылмыстық іс қозғады.
Прокуратураның мәліметінше, клуб басшылығының әрекеттері қаржыны мақсатсыз жұмсауға байланысты күмән тудырған. Аталған іс қоғамда үлкен резонанс тудырып отыр.
Айта кетейік, Шымкент әкімі Ғабит Сыздықбеков клубтың артық қаржылық міндеттемелері бар екенін мәлімдегеннен кейін бұл мәселе қоғам назарын ерекше аударды.
Ең көп талқыға түскен тақырып — ұлттық құраманың капитаны Асхат Тағыбергеннің ай сайынғы 20 миллион теңге көлеміндегі жалақысы болды. Бұл мәлімет қоғамда кең пікірталас тудырды.
2025 жылдың ақпанында футболшымен жасалған келісімшарт екі тараптың келісімімен мерзімінен бұрын бұзылды. Шартта айыппұл қарастырылғанына қарамастан ешқандай қаржылық талаптар қойылмаған.
Бұрынғы қалалық спорт басқармасының басшысы Маратбек Мықтыбеков бұл мәселеге қатысты түсініктеме берді:
"Асхат Тағыберген тарапынан ешқандай айыппұл төленген жоқ. Келісімшарт өзара келісім негізінде бұзылды. Менің басқару кезеңімде клубқа аудит жүргізілді. Бұл ашық айтылды. FIFA қамқорлығындағы ойыншылар халықаралық федерация бақылауында болды. Ал бонустарға келсек – бұл мәселені Қазақстан футбол федерациясы тікелей реттеді", — деді ол.
2023–2024 жылдары "Ордабасы" 18 ойыншымен жалпы сомасы 2,3 миллиардтан асатын теңгеге келісімшарт жасасқан. Оның ішінде 1,9 миллиард теңге тек бір жыл ішінде шетелдік легионерлерге төленген.
Сонымен қатар, соңғы бес жылда клубқа 23 миллиард көлемінде теңге бөлінгені белгілі болды. Алайда бұл соманың тек 11 пайызы, яғни шамамен 2,5 млрд теңге – бұқаралық футболды дамытуға жұмсалған. Қалған қаржы кәсіби ойыншылардың, оның ішінде айына 2 миллион теңгеге дейін жалақы алатын легионерлерді ұстауға кеткен.
