Роналду жанкүйерлерді өмір бойына стадионнан шеттетуді сұрады
Криштиану Роналду қаза тапқан Диогу Жотаның есімін ұрандатып, оның жақын досы Рубен Невешті арандатқан жанкүйерлерді қатаң жазалауға шақырды.
Португалиялық футболшы мұндай әрекетке барған жанкүйерлерге стадиондарға өмір бойы кіруге тыйым салынуы керек деп есептейді. Оқиға Сауд Арабиясы чемпионатының 12 қыркүйекте өткен "Әт-Тауавун" мен "Әл-Хиляль" арасындағы матчында болды. Кездесу "Әл-Хиляльдің" 6:0 есебімен жеңісімен аяқталды.
Матч барысында жанкүйерлер Рубен Невешке бағыттап, бірнеше рет "Жота" деп айқайлаған. Невеш марқұм футболшымен жақын дос болған.
Желіде тараған видеода Невеш жанкүйерлерге бірнеше рет көзіне саусағын көрсетіп, кейін аспанды нұсқағаны байқалады. Криштиану Роналду әлеуметтік желідегі видеоға пікір қалдырып, Сауд Арабиясы лигасын оқиғаға байланысты шара қолдануға шақырды.
"Өзін осылай ұстайтын адамдарға енді ешқашан стадионға келуге рұқсат берілмеуі керек", — деп жазды Роналду.
Диогу Жота жол апатынан қаза тапты
Диогу Жота 2025 жылғы 3 шілдеде Испанияның солтүстік-батысында болған жол-көлік апатынан қаза тапты. Футболшымен бірге оның інісі Андре Силва да көз жұмды.
Жота Португалия құрамасының және "Ливерпульдің" сапында өнер көрсетіп, еуропалық футболдағы танымал шабуылшылардың біріне айналған еді.