Шетелге жол жабық па? Ислам Чесноковтың болашағы анықталды
Қазақстан құрамасының шабуылшысы Ислам Чесноков алдағы уақытта қостанайлық "Тобыл" клубында өнер көрсетуді жалғастырады.
"Тобыл" Чесноковқа сенім артып отыр
"Серый CARDINAL" телеграм-арнасының мәліметінше, қостанайлық клубтың басшылығы Ислам Чесноковқа сенім артып, оны маусым соңына дейін құрамында ұстап қалуды жөн көрген. Айта кету керек, шабуылшы жуырда өткен Қазақстан кубогы аясындағы "Жеңіске" қарсы алаңға шықпаған. Оған ойыншының сары қағазды көп алуы себеп.
Шотландияға көшу
Дереккөздің мәліметінше, Ислам Чесноков Шотландияның "Хартс" клубына тек 2025 жылғы маусым аяқталғаннан кейін ауысады. Бұл трансфер бойынша келіссөздер жалғасып жатыр.
Бұған дейін "Хартс" бас бапкері Дерек Макиннес Исламды Шотландия чемпионаты басталмас бұрын қатарға қосуды жоспарлап отырғанын мәлімдеген. Егер бұл мерзімге дейін келісімге келу мүмкін болмаса, шотландиялық клуб қысқы трансферлік терезеде, яғни қаңтарда Чесноковты өз қатарына қосуды қайта қарастырады.