"Кішкентай Агуэро": Англия басылымы Дастан Сәтпаевтың голына назар салды
17 жастағы «Қайрат» шабуылшысы Дастан Сәтпаевтың Чемпиондар лигасының негізгі кезеңінде соққан алғашқы голы британдық The Sun таблоидының назарын аудартты.
Басылым оның тарихи жетістігін ғана атап қоймай, болашақ «Челси» ойыншысына ел ішінде берілген лақап атын да жариялады.
«Кішкентай Агуэро» және «Челси»-ге ауысу
26 қараша күні Сәтпаев «Копенгаген» қақпасына гол соғып, Чемпиондар лигасы тарихындағы ең жас гол авторларының тізімінде үшінші орынға шықты. Ол бұл көрсеткіште тек Ансу Фати мен Ламин Ямальға жол береді.
The Sun қазақстандық шабуылшы туралы былай деп жазады:
«Сол қанатта да ойнай алатын қазақстандық шабуылшыға отанындағы жанкүйерлер мен „Челси“-дің алғашқы жанкүйерлері „Кішкентай Агуэро“ деген лақап ат беріп үлгерді».
Британ басылымы оның бойының аласа екеніне, бұл «Челси» әдетте таңдаған шабуылшылардан өзгеше екенін атап өтті. Дегенмен, лондондық клуб оның «суыққандылықпен гол соғу шеберлігін, допты қатты әрі дәл бағыттай алуын» қуана қабылдайтынын айтады.
Рекордтық трансфер
Дастан Сәтпаев 2025 жылдың 10 ақпанында «Қайраттан» лондондық клубқа қазақстандық лига тарихындағы рекордтық 4,3 млн еуроға сатып алынды. Ол 2026 жылдың жазында 18 жасқа толған соң «Челсиге» қосылады.
The Sun сонымен қатар осы аптада Чемпиондар лигасында бірден бес жасөспірім футболшы гол соққанын, ал «Челси» олардың үшеуімен келісімшартқа отырғанын атап өтті: Сәтпаев Эстевао мен Жеовани Кенде қатарын толықтырды.