ҚФФ тәртіп бұзған клубтар мен футболшыларға үкім шығарды
Қазақстан футбол федерациясының Бақылау, тәртіптік және әдеп комитетінің отырысында Премьер-лиганың 19-туры аясындағы тәртіптік істерді қарап, бірнеше клубқа айыппұл салып, футболшылар мен клуб өкілдеріне жаза тағайындады.
Клубтарға салынған айыппұлдар
Тәртіп бұзушылықтарға байланысты “Оқжетпес” , “Қызылжар”, “Каспий”, “Жеңіс”, “Ақтөбе” және “Ұлытау” клубтарына 100 айлық есептік көрсеткіш (АЕК) көлемінде айыппұл салынды. Барлық қаржылық санкциялар 2026 жылғы 29 тамызға дейін төленуі тиіс.
- “Ақтөбе” клубы жанкүйерлердің матч аяқталғаннан кейін алаңға жүгіріп шығуы және дыбыс күшейткіш құрылғыларды пайдаланғаны үшін жауапқа тартылды.
- “Ұлытау” клубы жанкүйерлердің ресми өкілдерге қатысты балағат сөздер айтуына байланысты жазаланды.
Бірнеше футболшы ойыннан шеттетілді
ҚПЛ ойындарындағы тәртіп бұзушылықтар үшін бірнеше ойыншы дисквалификация алды:
- Александр Соколенко (“Қызылжар”) - 1 матч;
- Исламбек Қуат (“Жеңіс”) - 2 матч;
- Иван Шараванья (“Жеңіс”) - 2 матч;
- Роман Мұртазаев (“Елімай”) - 2 матч.
ҚФФ Әдеп кодексіне сәйкес, беделге нұқсан келтіретін сипаттағы мәлімдемелері үшін “Жеңіс” клубының директоры Айдын Қожахметовке 100 АЕК көлемінде айыппұл салынды.
Бас бапкерге ескерту берілді
“Ұлытау” клубының бас бапкері Нұркен Мазбаев матчтан кейінгі баспасөз мәслихатына қатыспағаны үшін ресми ескерту алды.