"Ақтөбенің" бас бапкері әйелдер лигасындағы клубтарды сынады
Әйелдер лигасының 17-тур аясында "Астанаға" қарсы өткен матчтан кейін Александр Семенов ойын барысына тоқталып, қарсыластардың "Ақтөбеге" қарсы ерекше дайындықпен шығатынын айтты.
25 тамызда өткен кездесу ақтөбеліктердің ірі есептегі жеңісімен аяқталды.
"Барлық команда бізге қарсы барын салып күреседі, ал бір-бірімен ойнағанда өзара келіседі. Бәрі бізге қарсы ойында үнемі соңына дейін күреседі. Бірінші таймда алаңға, оның ерекшелігіне үйрендік. Мұндай жағдайда ойнау оңай емес, сондықтан бейімделуге тура келді. Екінші таймда жағдайға бейімделіп, гол соқтық", — деді Семенов.
Бапкер өз командасының бірінші таймдағы ойынына да көңілі толмағанын жасырмады.
"Жеңетінімізді білдік, бірақ ойын сапасы жақсы болмады, кемшіліктер болды. Бұған өзіміз кінәліміз. Допты бақылап, комбинациялық футбол ойнаудың орнына түсініксіз пастар мен алысқа бағытталған доптарға көшіп кеттік. Алайда, екінші таймда есімізді жиып, жеңіске жеттік"
17 матч бойы жеңіліссіз серия
"Астанаға" қарсы ойында Морган Томас Рис 4, 28, 49, 55 және 93-минуттарда гол соғып, пента-трик авторы атанды. Сонымен қатар Аида Гайстенова мен Анжелика Кеона Айкидадан бір-бір голдан тіркелді.
17 турдан кейін "Ақтөбе" әйелдер чемпионатының турнирлік кестесінде көш бастап тұр. Команда кездесулердің барлығында жеңіске жетіп, 51 ұпай жинаған. Екінші орында 37 ұпаймен "Жеңіс" тұрса, үздік үштікті 35 ұпаймен "Қызылжар" түйіндейді.