Санжарәлі Бегалиев ағайынды Сабырхандардың жолын таңдады
Қазақстандық боксшы 2026 жылғы Қазақстан чемпионатына дайындығын Ілияс Оралбековтың жетекшілігімен бастады.
Бегалиевтің жаттығу видеосы жарияланды
Махмұд пен Төрехан Сабырханның жеке бапкері боксшының 80 келі салмақта өнер көрсететінін мәлімдеді. Ілияс Оралбеков Instagram парақшасында Бегалиевпен рингте жұмыс істеп жатқан сәтінен видео жариялады. Жазбада боксшының алдағы Қазақстан чемпионатына дайындалып жүргені айтылған.
"Санжарәлі Бегалиевтің Қазақстан чемпионатына дайындығы. 80 келі, күтіңіздер", – деп жазды бапкер.
Бегалиев соңғы халықаралық жарысында 75 келіге дейінгі салмақта жұдырықтасқан еді. Енді ел біріншілігіне 80 келі салмақта дайындалуда.
Оралбековтың шәкірттері Азиададан екі медаль әкелді
Бапкер жақында Жапонияның Айти және Нагоя қалаларында өткен Азия ойындарынан оралды. Бұл жарыста оның шәкірттері Махмұд пен Төрехан Сабырхан жүлдеге ие болды.
20 жастағы Төрехан Сабырхан 70 келіге дейінгі салмақта чемпион атанып, алтын медаль жеңіп алды. Ал ағасы Махмұд Сабырхан 55 келіге дейінгі салмақтың жартылай финалына жетіп, қола жүлдені еншіледі.
Санжарәлі Бегалиевтің соңғы турнирі сәуірде Бразилияның Фос-ду-Игуасу қаласындағы World Boxing әлем кубогының бірінші кезеңі болды. Жастар арасындағы әлем чемпионы 75 келіге дейінгі салмақтың ширек финалында әзербайжандық Саиджамшид Джафаровпен кездесті. Жұдырықтасу барысында төреші қазақстандық боксшыға екі рет нокдаун санады.
Жекпе-жек қорытындысында Бегалиев төрешілердің бөлек шешімімен жеңіліп, әлем кубогы кезеңін медальсіз аяқтады.