Өзбекстан Суперлигасы Қазақстан чемпионатынан озып кетті
Ресейлік журналист Александр Троицкий өзінің Telegram-арнасында Қазақстан және Өзбекстан чемпионаттарына қатысты қызықты деректі бөлісті.
Өзбекстан клубтарының жалпы құны артып кетті
Transfermarkt деректеріне сүйенсек, тарихта алғаш рет Өзбекстан Суперлигасындағы клубтардың жиынтық нарықтық құны Қазақстан Премьер-лигасынан асып түсті. Және бұл айырмашылық айтарлықтай үлкен.
Бұған дейін Қазақстандық клубтардың жалпы құны өзбек клубтарынан 1,5 есе жоғары болған. Мысалы 2023 жылы Қазақстан клубтарының жалпы нарықтық бағасы 138,5 миллион еуро болса, Өзбекстан клубтарының құны 88,5 миллион еуро болды.
Қалай өзгерді?
Өткен маусымда бұл көрсеткіштер бір-біріне жақындаған еді: Қазақстан Премьер-лигасы – 76,69 миллион еуро, Өзбекстан Суперлигасы – 76,10 миллион еуро.
Бірақ қазір Өзбекстан Суперлигасы 25 миллион еуроға алға шықты.
Мұның себебі неде?
Журналистің пайымдауынша, бұл өзгеріске бірнеше фактор әсер етті:
-
Қазақстандық клубтардың құнсыздануы – мемлекеттік бюджет есебінен легионерлерге бөлінетін қаржы азайтылды.
-
Өзбекстан Суперлигасының екі жаңа клубпен кеңеюі – алайда олардың нарықтық құны 2,5-3 миллион еуродан аспайды.
Қазақ лигасы қайта қымбаттай ма?
Қазіргі трансферлік терезе 37 күнге дейін ашық. Көптеген клуб әлі толық құрам жасақтаған жоқ. Сондықтан Қазақстан Премьер-лигасының құны қайта өседі деп күтілуде. Бірақ 25 миллион еуролық айырмашылықты жою екіталай.