"Барыстың" жаңа ойыншысы Астанаға келді (ВИДЕО)
Астаналық "Барыс" ХК жаңа шабуылшысы Джастин Бэйли елордаға жетті.
“Барыс” жаңа легионерін әуежайдан қарсы алды
31 жастағы Джастин Бэйлидің Астанаға келген сәтінен түсірілген видеоны “Барыстың” баспасөз қызметі әлеуметтік желідегі ресми парақшасында жариялады.
Бұған дейін қазақстандық клуб америкалық хоккейшімен бір маусымға арналған біржақты келісімшарт жасасқан еді. Келісім 2027 жылдың 31 мамырына дейін күшінде болады.
Джастин Бэйли осы уақытқа дейін бүкіл кәсіби мансабын Солтүстік Америкада өткізген. Өткен маусымда “Анахайм Дакс” жүйесіндегі “Сан-Диего Галлз” клубының намысын қорғады. Тұрақты чемпионатта 25 шайба соғып, командасының үздік мергені атанды.
AHL-де 500-ден астам матч өткізген
Бэйлидің Америкалық хоккей лигасындағы тәжірибесі де мол. Форвард AHL-де 500-ден астам матчқа қатысып, 182 шайба соққан және 140 нәтижелі пас берген.
Енді тәжірибелі шабуылшы ҚХЛ-да бақ сынап, “Барыстың” шабуыл әлеуетін күшейтуге тырысады.
Астаналық клуб жаңа маусым қарсаңында құрамын жаңартып, легионерлер қатарын тәжірибелі ойыншылармен толықтыруды жалғастырып жатыр.