"Ақтөбе" чемпиондар лигасындағы алғашқы матчында жеңіске жетті (ВИДЕО)
Волейболдан "Ақтөбе" ерлер командасы Азия чемпиондар лигасының топтық кезеңіндегі алғашқы ойынында жеңіске жетті. Турнир Жапонияның Осака қаласында өтуде. Ақтөбеліктер Австралия чемпионы – "Куинслэнд Пайрэтс" командасымен жолықты.
Жапониядағы жарқын бастама
"Ақтөбе" толығымен басымдық танытып, үш сетте қатарынан жеңіске жетті. Бұл нәтиже команда үшін Азия біріншілігіндегі сенімді бастаманың көрінісі болды.
Келесі қарсылас – Жапония чемпионы
Келесі кездесу 13 мамыр күні өтеді. Бұл жолы қазақстандық клуб Жапонияның мықты ұжымдарының бірі – "Сантори Санбердс" командасымен бақ сынайды. Бұл матч турнир тағдырын шешуде маңызды рөл атқармақ.
Ширек финалға топтағы үздік екі команда өтеді
А тобында үш команда бақ сынайды. Ең жоғары екі орынды иеленген ұжымдар 15 мамырда өтетін ширек финалға жолдама алады. Жартылай финал 17 мамырға жоспарланса, финалдық матч пен үшінші орын үшін ойын 18 мамырда өтеді.
"Ақтөбе" – дебюттік маусым және алғашқы табыстар
Айта кетейік, бұл – "Ақтөбе, клубының Азия чемпиондар лигасындағы алғашқы маусымы. Қазақстан біріншілігінде күміс жүлдеге ие болған олар Суперкубокты жеңіп, құрлықтық додаға қатысу құқығына ие болды.