Қазақстандық қыз Болгариядағы халықаралық турнирде алтын медаль иеленді
Жәния Бекмұхамбетова үстел теннисінен Болгарияда өткен WTT Youth Contender халықаралық турнирінде топ жарды. Ол 13 жасқа дейінгі спортшылар арасында алтын медаль жеңіп алды.
Алғашқы жеңістер – сенімді қадам
Қазақстан ұлттық құрамасының жас өкілі Жәния Бекмұхамбетова Болгариядағы беделді WTT Youth Contender жарысында ел намысын абыроймен қорғады. Бұл турнир – халықаралық деңгейдегі маңызды дода, онда түрлі елдердің болашағынан зор үміт күттіретін жас спортшылары бақ сынайды.
Жолындағы қарсыластарын тас-талқан етті
Жәния турнир барысында бірқатар мықты қарсыластарын тізе бүктірді. Атап айтқанда, ол турнир қожайындары Радина Захариева, Мартина Николова мен Белослава Балкансканы, сондай-ақ словакиялық Вивьен Муркова мен румыниялық Карисс Сербан және Бьянка Томуды сенімді түрде жеңіп шықты.
Айта кетейік
WTT Youth Contender турнирі – әлемдік үстел теннисі федерациясы ұйымдастыратын жасөспірімдер арасындағы беделді жарыс. Мұнда 11-19 жас аралығындағы спортшылар өз шеберліктерін паш етеді. Жанияның жеңісі – Қазақстанның халықаралық аренадағы беделін арттыра түсетін оқиға.