Эстергом қаласында мәресіне жеткен 100-ші "Венгрия туры" көпкүндігінде "XDS Astana Team" клубының велошабандозы Харольд Мартин Лопес жалпы есепте жеңімпаз атанды.
Лопес жарыстың шешуші таулы кезеңінде басқаларды артта қалдырып, мәреге бірінші болып жетті. Осы сәтті пайдаланып, командасының үйлесімді қолдауының арқасында көшбасшылық орнын сақтап қала алды. Соңғы кезеңнің қиын бедері мен тастөсеніштегі финишіне қарамастан жалпы есепте өзгерістер болмады. Нәтижесінде Харольд Мартин Лопес биылғы маусымдағы төртінші жеңісіне жетті.
"Бүгінгі кезең өте күрделі болды. Бұл – қысқа өрлер мен тастөсенішке толы нағыз біркүндік жарыс болды. Бірақ командам тағы да керемет жұмыс атқарды. Бұл жеңіс — менің серіктестерімнің еңбегінің жемісі. Олар жарысты толық бақылауда ұстады. Қарсыластарымыз ерте озып, бонустық секундтар жинап алмасын деп барын салды. Соңында мені алдыңғы қатарға алып шықты. Сол арқылы мен қарсы шабуылдарға сәтті жауап бере алдым. Жеңіске жеттік. Өте қуаныштымын, үйге керемет әсермен ораламын. Маусымның алғашқы жартысы қиындықтарға қарамастан сәтті өтті — төрт жеңіс, соның екеуі жалпы есепте. Енді аздаған үзіліс алып, келесі кезеңге дайындықты бастаймын, — деді Лопес.
