Қазақстан құрамасы көркем гимнастикадан Сингапурдегі Азия чемпионатында кезекті алтын медаль иеленді.
Құрлықтық додада қазақстандық гимнасшылар топтық жаттығулар бағдарламасы бойынша үздік нәтиже көрсетіп, шеңберлер мен доптармен финалдық кезеңде жеңіске жетті. Олар 26.65 ұпаймен Азияның мықтылары арасында дара шықты.
Екінші орынды Өзбекстан құрамасы иеленсе (25.15 ұпай), Оңтүстік Корея (24.25 ұпай) үздік үштікті түйіндеді.
Сонымен қатар Қазақстан құрамасы бес лентамен орындалған жаттығуларда екінші орынға ие болды. Бұған дейін біздің спортшылар топтық жаттығуларда көпсайыс бойынша алтын медаль жеңіп алды.
Жекелей сында да қазақстандық гимнасшылар керемет нәтиже көрсетті. Айбота Ертайқызы лентамен орындалған жаттығуда алтын жүлде иеленсе, көпсайыста қола медаль алды. Ал Айым Мейіржанова булавалармен жаттығуда үшінші орынды иеленіп, жүлдегерлер қатарына қосылды.
