Астанада Мәдениет және спорт вице-министрі қызметін атқарған Ерлан Қожағапановқа қатысты сот үкімі жарияланды. Ол лауазымдық өкілеттігін асыра пайдалану және ірі көлемдегі қаражатты жымқыру фактілері бойынша кінәлі деп танылды.
Сот үкіміне сәйкес, Ерлан Қожағапанов ҚР Қылмыстық кодексінің 361-бабы, 4-бөлігі, 3-тармағы бойынша кінәлі деп танылып, 3 жыл мерзімге бас бостандығынан айырылды.
"Қожағапанов Ерланды кінәлі деп танып, оған 3 жыл бас бостандығынан айыру жазасын тағайындау. Сондай-ақ оны мемлекеттік қызметте, сот жүйесінде, жергілікті өзін-өзі басқару органдарында, ҚР Ұлттық банкінде және оған қарасты ұйымдарда, ұлттық холдингтер мен компанияларда өмір бойына қызмет атқару құқығынан айыру," — делінген сот үкімінде.
Сонымен қатар оның қамауда болған уақыты есепке алынып, 2024 жылдың 1 наурызынан бастап әрбір 1 күні 1,5 күнге теңестіріліп саналады.
"Success K" компаниясының басшысы Ляззат Көккөзова да осы іс бойынша кінәлі деп танылып, ҚР ҚК 190-бабының 4-бөлігі ("Алаяқтық") бойынша 5 жылға бас бостандығынан айырылды. Оған да 7 жыл мерзімге басшылық қызмет атқаруға тыйым салынды.
Антикоррупциялық қызметтің мәліметінше, іс бойынша келтірілген материалдық шығын 1 миллиард теңгеден асып кеткен. Ерлан Қожағапанов пен серіктестері мемлекеттік қаржыны мақсатсыз пайдалану және өкілеттіктерін асыра пайдалану арқылы ауыр зардаптарға себепші болған.
Қылмыстық кодекстің 361-бабына сәйкес, мемлекеттік функцияларды орындайтын немесе соған теңестірілген тұлғалардың өз өкілеттіктерін жеке немесе өзгелердің пайдасына заңсыз пайдалану, егер бұл ауыр салдарға әкелсе, 7 жылға дейін бас бостандығынан айыру жазасымен жазаланады.
