Астанада шахматтан Қазақстан чемпионатының финалы өтеді

2025 жылғы шахматтан Қазақстан чемпионатының басты кезеңі — финалдық турнир — биыл 21 мамыр мен 1 маусым аралығында Астана қаласында өтеді. Бұл жолы жарысқа үздік 28 спортшы қатысқалы отыр. Турнирдің ерекшелігі — онда командалық бөлініс болмайды. Бір командада ойнаған шахматшылар да енді бір-біріне қарсылас.

Бұл финал – есеп үшін емес, мәртебе үшін

Турнир Open және Women деп аталатын екі санатта өтеді. Әрқайсысында 14 қатысушыдан. Жарыс айналмалы жүйе бойынша 13 турдан тұрады. Әр партияға 90 минут және әр жүріске 30 секунд беріледі. 

Қатаң іріктеу – мықтылар ғана финалда

Қатысушылар қатарында:

• 2024 жылғы Қазақстан чемпионатының үздік 5 шахматшысы

• 2025 жылғы жартылай финалдың 3 жеңімпазы

• 2025 жылғы жастар чемпионатының 2 үздігі (U18 және U20)

• ҚШФ Жаттықтырушылар кеңесінің 4 арнайы ұсыныс иегері бар.

Назар аударарлық шахматшылар кімдер?

Women санатында:

• Меруерт Камалиденова – екі дүркін ел чемпионы (2021, 2022)

• Ксения Балабаева – 2023 жылғы чемпион

• Амина Қайырбекова – қазіргі ел чемпионы

• Алуа Нұрман – Азияның блиц чемпионы

• Елназ Қалиахмет – небәрі 14 жаста, халықаралық деңгейдегі жүлдегер

Open санатында:

• Қазыбек Нөгербек – жастар арасында әлем чемпионы (U20)

• Денис Махнёв – екі дүркін Қазақстан чемпионы

• Алдияр Ансат – 2023 жылғы ел үздігі

• Рамазан Жалмаханов – 2022 жылғы чемпион

Қатысушылардың жасы 13 пен 30 аралығында — бұл финал жас дарын мен тәжірибелі шеберлер арасындағы шынайы текетіреске айналмақ.

Жүлде қоры – 20 миллион теңге

• 1-орын – 3 000 000 тг

• 2-орын – 2 000 000 тг

• 3-орын – 1 500 000 тг

• 4–7 орындарға: 1,2 млн, 900 мың, 700 мың, 500 мың теңге көлемінде сыйақы беріледі.

Турнир қайда және қашан өтеді?

• Өтетін жері: Қазақстан шахмат федерациясының кеңсесі

• Күндері: 21 мамыр – 1 маусым