Олимпиада чемпионын ұтқан қазақ баласы! Таеквондода тарихи жеңіс тіркелді
АҚШ-тың Шарлотт қаласында өтіп жатқан 2025 жылғы Grand Prix Challenge жарысында Қазақстанның таеквондо шеберлері сенсациялық нәтиже көрсетті. Ел құрамасының мүшелері – Тамерлан Тілеулес пен Батырхан Төлеуғали — халықаралық аренада қола медаль иеленіп, 44 елдің ішінен үздіктер қатарына енді.
Шарлоттадағы сәтті бастама
АҚШ-тың Шарлотт қаласында өтіп жатқан 2025 жылғы Grand Prix Challenge сериясының алғашқы кезеңінде Қазақстан құрамасы бірінші медальдарын иеленді. Таэквондо федерациясының мәліметінше, турнирдің екінші күнінде біздің спортшылар екі қола медаль еншіледі.
Жүлдегерлер:
- Тамерлан Тілеулес (58 кг дейін) — өзінің World Taekwondo турнирлеріндегі алғашқы жүлдесін иеленді. Ерекше атап өтерлігі, қола медаль үшін өткен кездесуде ол Олимпиада чемпионы, италиялық Вито Делль’Акуиланы 2:0 есебімен ұтты.
- Батырхан Төлеуғали (80 кг дейін) — Қазақстан құрамасының көшбасшысы бұл жолы да сенімді өнер көрсетті. Қола медаль үшін өткен жекпе-жекте чилилік Хоакин Черчиллге қарсы шығып, екінші раундта айқын басымдықпен жеңіске жетті.
Келесі аялдама — Рим
Жүлделі орындардан бөлек, бұл нәтиже қазақстандық спортшыларға 2026 жылы Италияның Рим қаласында өтетін келесі Гран-при кезеңіне жолдама алуға мүмкіндік берді.
Айта кетейік, Grand Prix Challenge — бұл Дүниежүзілік таеквондо федерациясы (World Taekwondo) ұйымдастыратын беделді серия. 2025 жылғы алғашқы кезеңге 44 елден келген 376 спортшы қатысты.