Бибісара Асаубаева Президент марапатына ие болды
Блицтен үш дүркін әлем чемпионы Қасым-Жомарт Тоқаевтың Жарлығымен "Барыс" орденінің II дәрежесімен марапатталды.
Асаубаева "Барыс" орденін алды
Қазақстан шахматының жарық жұлдызы Бибісара Асаубаева әлеуметтік желідегі парақшаларында қуанышты жаңалығын жариялады. Оған көптен күткен мемлекеттік награда ресми түрде табысталған.
Шахматшыға Қазақстан Республикасының Президенті Қасым-Жомарт Тоқаевтың Жарлығымен "Барыс" орденінің II дәрежесі берілді.
Асаубаева Instagram және Telegram желілерінде жариялаған видеосында орденді көрсетіп, әсерін бөлісті.
"Бәріне сәлем. Мен көптен күткен “Барыс” орденінің II дәрежесін алдым. Менде бұған дейін III дәрежесі бар еді, енді I дәрежесі қалды. Сонда толық кавалер боламын. Қараңыздаршы, қандай әдемі. “Барыс” өте ерекше түсте жасалған", — деді Бибісара Асаубаева.
Шахматшының жетістіктері
Бибісара Асаубаева — Қазақстандағы ең титулды шахматшылардың бірі. Ол блиц шахматтан үш мәрте әлем чемпионы атанып, халықаралық аренада ел намысын бірнеше рет қорғады.
Биыл үміткерлер турнирінде екінші орын алып, әйелдер шахматындағы әлемдік деңгейдегі жетекші ойыншылардың қатарында екенін тағы бір дәлелдеді.
Еске сала кетейік, 10 маусым күні Бибісара Асаубаева Қазақстан Президенті Қасым-Жомарт Тоқаевқа бейнеүндеу жолдаған.
Norway Chess-2026 беделді турниріндегі жеңісінен кейін шахматшы қаржыландыру мәселесіне назар аударып, Туризм және спорт министрлігі мен шахмат федерациясы тарапынан қолдауға қатысты қиындықтар бар екенін айтқан.
Осы оқиғадан кейін Асаубаеваның жағдайы спорт қоғамдастығында кеңінен талқыланды.