Депутат: Легионерлерден үнемделген қаржыны ауыл спортына бағыттау қажет
Бұл жөнінде Мәжіліс депутаты Данияр Қасқарауов мәлімдеді.
Парламент қабырғасында қаралып жатқан дене шынықтыру және спорт жөніндегі заң жобасында шеттен келетін спортшылар мәселесіне ерекше мән берілген. Халық қалаулылары легионерлерге мемлекеттік бюджеттен бір теңге де бермеу туралы норманы енгізді. Жұмыс тобының өкілдері оны бірауыздан қолдады.
Заң күшіне енгеннен кейін қазына қаржысына шетелден спортшы мүлдем әкелінбейді. Оны тек шақырушы тарап өзінің ақшасымен не демеуші көмегімен жүзеге асыра алады.
“Бізге ұлтымыздың дені сау, мықты болғаны маңызды. Осы жағынан көңіл бөліп үнемделген қаражат болса спорттық базалар салуға, әсіресе ауылдық жерлерде бір мезгіл жастар жиналатын спорт залдар керек.
Қазір ауылдарда спорт залдар жетіспеушілігі қатты сезіледі. Ел аралағанда халық саны 40 мыңға жететін ауылдардың өзінде спорт залдары жоқ”, – деп мәлімдеді ҚР Парламенті Мәжілісінің депутаты Данияр Қасқарауов.