"Қазақтың қуатын көрсетейін": Батыр Жүкембаев Турки Аль аш-Шейхтен мүмкіндік сұрады
Бірінші орта салмақтағы қазақстандық кәсіпқой боксшы Батыр Жүкембаев (24-1, 17 KO) Сауд Арабиясындағы ең ірі бокс шоуларының ұйымдастырушысы, Турки Аль аш-Шейхке ашық өтініш жолдады.
“Маған қазақтың күшін көрсетуге рұқсат ет”
Әлеуметтік желідегі парақшасында Батыр:
“Маған қазақтың қуатын көрсетуге мүмкіндік бер”, – деп жазып, Теренс Кроуфорд пен оның бапкері Брайан Макинтайрды да белгілеген. Айта кетейік, Жүкембаев соңғы жылдары осы екеуімен бір командада жаттығып жүр.
Сауд Арабиясы – бокстың жаңа сахнасы
Турки Аль аш-Шейх – Сауд Арабиясының ойын-сауық саласын басқаратын тұлға және қазіргі таңда әлемдік деңгейдегі бокс кештерінің басты ұйымдастырушысы ретінде танымал. Оның шоуына қатысу – әлемнің түкпір-түкпіріндегі боксшылар үшін үлкен мүмкіндік.
Батырдың соңғы жекпе-жегі
5 сәуірде Астанада өткен жекпе-жекте Жүкембаев британиялық Кейн Гарднерді (17-5, 7 КО) 10 раунд бойы басымдықпен ұтып, төрешілердің бірауызды шешімімен жеңіске жетті.
Батыр Жүкембаев өзінің кәсіби мансабындағы жалғыз жеңілісін 2021 жылдың 29 мамырында пуэрто-риколық Сабриэль Матиясқа (23-2, 22 КО) қарсы кездесуде мерзімінен бұрын ұтылған. Содан бері ол жеңісті жолына қайта оралды.