Иман Хелиф Олимпиада жанжалынан кейін бокстан кетіп қалды
Алжирлік боксшы Иман Хелиф Париж Олимпиадасындағы даулы жеңісінен кейін рингке қайта шықпады. Бұл ақпаратты бұрынғы бапкері әрі менеджері Нассер Йефсах растады.
Олимпиададағы жеңіс пен жанжал
2024 жылғы Олимпиада ойындарында Хелиф 66 келіге дейінгі салмақта алтын жүлде иеленді. Бірақ турнир барысында 2023 жылы әлем чемпионатынан гендерлік тесттен өте алмағаны үшін шеттетілгені белгілі болды. Тест оның биологиялық тұрғыдан ер адам екенін көрсеткен.
Ойындардан кейін Иман кәсіпқой боксқа өтетінін жариялап, Франциядағы Nice Azur Boxe клубынан кеткен еді.
Кәсіпқой мансапқа көшу жүзеге аспады
Йефсахтың айтуынша, клуб Хелифке кәсіби келісімшарт ұсына алмады. Себебі қаржы жеткіліксіз болған. Оның Сингапурда бір ғана жекпе-жегі өтті. Бастапқыда бес кездесу жоспарланғанымен бұл орындалмады.
"Иман тек Ниццаны емес, жалпы боксты да тастады. Қазір ол рингке шықпайды, тек Алжирде немесе Катардың ұлттық орталығында жаттығулар жасайды. Негізінен демеушілік келісімдердің арқасында саяхаттап жүр. Бірақ кәсіби мансапқа оралуы екіталай, өйткені ондай жағдайда ол тағы да гендерлік тесттен өтуге тиіс болады", — деді Йефсах Nice Matin басылымына.